Home Lajme KOSOVË Liburn Aliu del sot para Gjykatës

Gjykata Themelore e Prishtinës ka caktuar 6 prillin si data e mbajtjes së shqyrtimit fillestar në rastin ndaj Liburn Aliut, dhe të tjerëve të cilët po akuzohen për keqpërdorim të detyrës zyrtare.

Lajmin e ka konfirmuar zëdhënësja e Gjykatës së Prishtinës, Mirlinda Gashi.

Seanca do të fillojë sot në ora 10:00.

Ndryshe, para disa ditësh Prokuroria Themelore në Prishtinë, Departamenti i Krimeve të Rënda kishte njoftuar se Liburn Aliu, tash ministër i Mjedisit, Planifikimit Hapësinor dhe Infrastrukturës, kishte qenë në dijeni për ngritjen e aktakuzës për “Keqpërdorim të pozitës apo autoritetit zyrtar”.

Në komunikatën thuhej se “Njësiti për Krime Ekonomike dhe Korrupsion, njofton opinionin se më 23 prill 2018, ka pranuar kallëzim penal ndaj personave L.A., A.O., Z.R., N.K., B.U., M.B., në atë kohë zyrtarë të Komunës së Prishtinës, në drejtim të veprës penale “Keqpërdorimi i pozitës apo autoritetit zyrtar”.

Ndërkaq, ministri i ri i Mjedisit, Planifikimit Hapësinor dhe Infrastrukturës në Qeverinë Kurti, Liburn Aliu kishte mohuar se ndaj tij ekziston një aktakuzë për keqpërdorim të detyrës zyrtare gjatë kohës sa ka qenë drejtor i Urbanizmit në Komunën e Prishtinës.
Kryeministri Kurti gjatë tërë karrierës së tij politike ka premtuar që nuk po do të ketë persona me aktakuza gjatë qeverisjes së Lëvizjes Vetëvendosje, ku ky ka qenë arsyetimi kryesor i presionit publik nga Shoqëria Civile si Ec Ma Ndryshe dhe KDI ndaj Qeverisjes Lokale në Prizren.Në atë kohë janë numëruar ditët duke kërkuar shkarkimin e drejtorëve me aktakuza. Ndërsa tani ende nuk kemi ndonjë reagim nga akterët e njëjtë, për emërimin e ministrit me aktakuzë.
Duhet të presim në ditët në vijim se a do të jetë presioni i njëjtë ndaj Kryeministrit Kurti për këtë emërim.