Home Lajme Tashmë Shqipëria dhe Amerika janë partnerë strategjikë

Ministri i Punëve të Jashtme, Ditmir Bushati dhe zv.ndihmës Sekretarja e Shtetit, Victoria Nuland nënshkruan dje deklaratën e përbashkët për Partneritetin Strategjik midis Shqipërisë dhe Shteteve të Bashkuara.

“Ndihem e nderuar që jam këtu për të nënshkruar së bashku me Ministrin Bushati Deklaratën e Partneritetit Strategjik midis Shteteve të Bashkuara dhe Shqipërisë, e cila përmbush angazhimin që Sekretari Kerry dhe Kryeministri Rama i bënë njëri-tjetrit gjatë Samitit të NATO-s në Uells në shtator, për ta çuar marrëdhënien tonë në nivele të mëtejshme. Siç thotë edhe shprehja shqiptare, “miku i mirë njihet në ditë të vështira.” Shqipëria ka qenë mike e Shteteve të Bashkuara në kohë të vështira dhe në kohë të mira, dhe sot, ne e çojmë më tej këtë miqësi nëpërmjet këtij dokumenti që po nënshkruajmë”, deklaroi Nuland.

Zyrtarja e lartë amerikane vlerësoi hapat përpara të vendit tonë drejt integrimit në Bashkimin Evropian, integrim që Uashingtoni e mbështet pa rezerva.

“Shtetet e Bashkuara janë pranë Shqipërisë, duke dhënë ndihmë në reformën e sistemit të drejtësisë dhe gjyqësor; duke bashkëpunuar në luftën kundër korrupsionit dhe krimit të organizuar; duke ndihmuar dhe forcuar qeverinë vendore dhe administratën publike; ashtu si edhe e përmenda më parë, duke rritur investimet; dhe duke e kthyer Shqipërinë në një urë të tregut energjetik për Evropën, sidomos në gazsjellësin Trans-Atlantik”, vijoi Nuland.
Nga ana e tij, ministri Bushati u shpreh se, “partneriteti Strategjik i Shqipërisë me Shtetet e Bashkuara është një fakt themelor drejt konsolidimit të demokracisë dhe zhvillimit ekonomik të vendit”.

“Ne i jemi mirënjohës Shteteve të Bashkuara për kontributin e vazhdueshëm në ato fusha që përkasin me reformat që ne kemi ndërmarrë, në mënyrë që Shqipëria të pranohet në Bashkimin Evropian”, tha ai.
Shqipëria kërkon të zgjerojë bashkëpunimin me Shtetet e Bashkuara në të gjitha fushat, jo vetëm në atë të sigurisë dhe mbrojtjes.

“Po përqendrohemi edhe në ekonomi, sigurinë energjetike, të drejtat e njeriut, shkencë, arsim dhe shumë të tjera. Jam i lumtur teksa pohoj se nëpërmjet nënshkrimit të këtij dokumenti sot, ne e ngremë marrëdhënien tonë në nivele më të larta”, tha ministri Bushati.